Neste sentido, adiantou a intención do seu goberno de entregar aos familiares daqueles que estiveron retidos no campo de concentración un certificado, emitido polo Concello, no que se recollerá o texto seguinte: "A memoria, cando acode á nosa chamada da man da verdade, móstranos o que fomos e nalgunhas ocasións ensínanos o que non deberiamos volver ser. O pobo de Cedeira vive hoxe asulagado pola dor do que xa non ten volta atrás. É o noso deber e o noso desexo devolver a todas aquelas persoas que sufriron en Cedeira a represión que trouxo consigo o golpe de estado de 1936, a través das súas familias, o seu dereito á inocencia".

A delegación asturiana que se desprazará á vila estará integrada por unhas 60 persoas, aproximadamente.

O presidente Vicente Álvarez Areces estará acompañado da viceconselleira de Seguridade e Emigración, María Teresa Ardiz -cuxo pai estivo retido no campo de concentración de Muros- e o viceconselleiro de Benestar Social, Angel González, entre outros responsables do seu goberno. Ademais dos actos oficiais, o Concello de Cedeira ofrecerá un xantar frío aos visitantes e aproveitará, así mesmo, a súa presenza para mostrar o potencial turístico e etnográfico dunha poboación que estes días vive precisamente os actos centrais dos festexos do Samaín.