O responsable deste éxito foi o equipo que, dirixido por Xosé Abad, e impulsado por Memoria Histórica Democrática e Fuco Buxán, converteu nun filme dunha hora o relato da morte de Alejandro Porto Leis, Modesto del Río, Jesús Miño Loureiro e Avelino Landeira Maneiras. Os catro foron fusilados polos golpistas, en 1937, polas súas ideas. Porto Leis era o alcalde republicano de Serantes e os outros tres axudárono a ocultarse. A investigación dun familiar político, Paulino Gasalla, máis de 70 anos despois do suceso, desvelou como a perversa manobra de converter en verdugos ás vítimas tivo consecuencias nas propias relacións da familia que, despois de colaborar na realización do traballo e de enfrontarse ó acontecido, superaron décadas de frialdade.

Xosé Abad, o director da cinta, asegurou que o espírito que move "O segredo da Frouxeira" é o de "recoñecer a verdade", sen ningún ánimo de vinganza. Trátase "de impedir o silencio e defender a dignidade de quen deron a vida pola liberdade", asegurou. Ademais, agradeceu o apoio de tódalas entidades a institucións que apoiaron o proxecto (entre elas o Concello de Ferrol) e tivo un especial agarimo polos membros de Bartoleta Teatro, "que interpretaron con altísima profesionalidade e forza dramática o acontecido na Frouxeira".

Tamén se uniu á petición de dedicarlle a Porto Leis e ós outros tres asasinados un espazo público. "Non podemos esquecer".

Vicente Irisarri, pola súa parte, louvou un traballo ó que o Concello se uniu desde o primeiro momento porque "era un proxecto no que un municipio democrático tiña que participar". Ademais, referiuse á súa "indubidable calidade" e tamén á importancia de coñecer e lembrar o que sucedeu na Guerra e na posguerra para "impedir que volva suceder". Por iso deu as grazas ós que defenderon a democracia. "Eles son o noso exemplo", apuntou.